Archives: Podcast Clips

‘n Groep kortverhaalskrywers het in opdrag van RSG Kunstefees 2016 ‘n storie geskryf rondom die opdrag – “Nee wat, die koek is droog…” Die uiteenlopende verhale is kostelik, speels, humoristies en oorspronklik.

‘n Spesiale versprogram waarin gedigte oor landskappe, taal en verganklikheid gehoor kan word. Die verse kom uit Johan Myburg se nuwe, nog ongepubliseerde bundel, Uittogboek, wat volgende jaar by Protea verskyn. Myburg het in 1984 met Vlugskrif gedebuteer en dit met Kontrafak opgevolg. Kontrafak het in 1995 die Eugène Marais-prys ontvang. Die bundel Kamermusiek – beskryf as ‘n “moet-hê vir enige fynproewer se rak” – het in 2008 gevolg.

Sulamiet is die digter en letterkundige Lina Spies se tiende digbundel en word eksklusief tydens die RSG Kunstefees 2016 bekend gestel. Die titel Sulamiet verwys na die vroulike spreker in die Bybelboek Hooglied waarin die verlore tuin van Eden na die sondeval deur die liefde herskep word. Die verse handel oor die liefde in vele vorme, die belewenis van die religieuse, die skoonheid van die natuur asook die kunste waaraan daar altyd ‘n tekort is weens menslike ontoereikenheid.

Hierdie opdragwerk handel oor die lewe van Beyers Naude, wat in 1993 vir die Nobelprys vir vrede benoem is. Naude het 14 eredoktorsgrade in sy leeftyd ontvang, asook onder meer die Franklin D. Roosevelt Four Freedoms Award in die VSA. Engel met ‘n hamer is ‘n geskiedkundige drama oor die lewe van die dominee, teoloog en anti-apartheidsaktivis Beyers Naude, ook bekend as oom Bey. Dit is die storie van iemand wat die moed gehad het om te sê: “Tot hiertoe en nie verder nie. Ek mag nie langer stilbly en niks doen nie.” Tussendeur die onstuimige gebeure vertel die bekroonde radiodramaturg Joey van Niekerk ‘n aangrypende liefdesverhaal. Bowenal is dit ‘n drama oor geloof en hoop. Met Andre Weideman, Cintaine Schutte, Juanita Swanepoel, Johann Nel, Susanne Beyers, Deon Lotz, Johann Stassen, Ronel Geldenhuys en Pieter Cillie.

Luister na ‘n herhaling van een van die produksies wat tydens RSG Kunstefees 2015 groot aftrek gekry het: Die digters toor met woorde en borduur vrolik voort op verse van onder andere Boerneef en Barend J. Toerien. Hulle moet ook binne vyf minute ‘n bekende en klassieke Afrikaanse gedig nuwe lewe gee. Poësie was lanklaas soveel pret en plesier. Met Ilse Salzwedel en digters Diana Ferrus, Andries Bezuidenhout en Philip de Vos, en voorlesings deur Elize Cawood.

Prof. Nelus Niemandt, uittredende moderator van die NG Kerk aan die beurt in die derde aflewering van die reeks.

Flip Loots gesels met prof. Mary-Anne Plaatjies, moderator van die Verenigende Gereformeerde Kerk, wat sê dat sy hoorbaar gehoor het hoe God haar tot die bediening roep.

Flip Loots gesels met dr. Isak Burger, president van die AGS van Suid-Afrika, wat aanvanklik medies wou studeer.

Dit lyk asof Poen alles vergeet het – tot sy woorde! En nou moet daar vinnig ‘n nuwe superheld gekies word, anders stuur die konsert op ‘n fiasko af!

Christelle Webb-Joubert gesels met die kunstenaar Diane Victor oor haar lewe en werk.